सामाजिक विकास मन्त्रीद्वारा हिमाका दुई नमुना विद्यालय भवन उद्घाटन
हिमाको भैरव आधारभुत विद्यालय जोगीवाडा र महादेव आधारभुत विद्यालय कुडुमा निर्माण भएका ४/४ कोठे बालमैत्री, विद्यालय भवन तथा लैङ्गिक समावेशी शौचालय सहितको विद्यालय भवन उद्घाटन गरिएका हुन।
जुम्लाको हिमा गाउँपालिकाका दुई सामुदायिक विद्यालयमा निर्माण गरिएका दुई नमुना भवनको उद्घाटन गरिएको छ। बुधबार कर्णाली प्रदेशका सामाजिक विकास मन्त्री घनश्याम भण्डारीले दुबै भवनको उद्घाटन गरेका हुन।
पेस नेपाल र प्लान इन्टरनेशनल नेपालको साझेदारीमा सञ्चालित ‘आधार परियोजना’को लगानीमा दुर्गमका सामुदायिक विद्यालयमा बालमैत्री बसाई व्यवस्थापन, हिउँदको चिसो छेक्ने वाल सिलिङ गरिएका कक्षा कोठा, छात्रा छात्र छुट्टा छुट्टै शौचालय भएको, भूकम्प प्रतिरोधी लगायतका सुविधा सहितको विद्यालय भवन निर्माण गरिएका हुन।
हिमाको भैरव आधारभुत विद्यालय जोगीवाडा र महादेव आधारभुत विद्यालय कुडुमा निर्माण भएका ४/४ कोठे बालमैत्री, विद्यालय भवन तथा लैङ्गिक समावेशी शौचालय सहितको विद्यालय भवन उद्घाटन गरिएका हुन।
बुधबार एक भव्य समारोहको आयोजना गरि दुई वटै विद्यालय भवनको उद्घाटनसँगै गर्दै मन्त्री भण्डारीले विकटका सामुदायिक विद्यालयमा यत्तिको सुविधायुक्त भवन बन्नु सामुदायिक शिक्षा सुधारको लागि आशा लाग्दो कार्य भएको बताए। हिमाले पढाई मेलादेखि सामुदायिक विद्यालय सुधारका क्षेत्रमा गरेको अभ्यासहरु अनुकरणीय रहेको समेत मन्त्री भण्डारीको भनाइ छ।
हिमा गाउँपालिका अध्यक्ष लक्ष्मण बहादुर शाहीले दातृ निकाय संगको समन्वय सहकार्यमा हिमाले पूर्वाधार सहितको गुणस्तरीय शिक्षा प्रदान गर्ने वातारण सृजना गरेको बताए।
‘मैत्रीपूर्ण पूर्वाधार बिना गुणस्तरीय शिक्षाको कल्पना गर्न सकिदैन्। विद्यालय विद्यालय टिक्ने वाताबरण बनाउनु पालिकाको दायित्व हो,’ उनले भने, ‘सबै काम पालिकाकै लगानीले सम्भव छैन। त्यसका पेश नेपालले करोडबढी लगानी गरेर हिमाको शैक्षिक सुधारमा ईट्टा थपेको छ। यो कार्यप्रति आभारी छौं।’
भैरव आधारभुत विद्यालय जोगीवाडाको चार कोठेका विद्यालय भवन कूल ६१ लख ८५ हजार ३४३ रुपैया लगानीमा निर्माण भएको हो भने महादेव आधारभुत विद्यालय कुडुमा ६३ लाख दुई हजार ८६८ रुपैया लगानीमा भवन निर्माण भएको पेश नेपाल जुम्लाका कार्यकारी निर्देशक किशोर न्यौपानेले बताए।
‘विद्यालयको पूर्वाधार विकाससंगै कक्षाकोठा व्यवस्थापन सम्म गरी कूल एक करोड २४ लाख बढीको रकम लगानी भएको छ,’ उनले भने, ‘आधार परियोजना अन्तरर्गत बनेका विद्यालय भवनहरु पालिकाको माग र आबश्यकतालाई मध्यनजर गर्दै सामुदायिक शिक्षा सुधारको लक्ष्यले निर्माण गरिएको हो।’
उनका अनुसार विकटका सामुदायिक विद्यालयका भवन प्राय पुराना र जीर्ण भएकोले विद्यार्थी जोखिम मोलेर अध्यायन गर्न बाध्य छन्। हिमामा भनेका दुई वटै विद्यालय भवन भुकम्पीय जोखिमका दृष्टिले पनि निकै मजबुद भएकोले बालबालिका ढुक्कले पढ्न सक्नेछन्।
बालबालिका मैत्री विद्यालय भवन बनेसँगै विद्यालयमा बालबालिकाको पहुँच बृद्धिहुनेमा विश्वास बढेको हिमा गाउँपालिकाकी उपाध्यक्ष सुर्पना शाहीले बताइन्।
